Хачигт халдварын эсрэг вакцин хийлээ

Онцгой байдлын газрын алба хаагчид хөдөө орон нутаг, гамшгийн голомтод үүрэг гүйцэтгэдэг тул хачигт халдварын эсрэг вакцинд зайлшгүй хамрагдах шаардлагатай байдаг. 04 дүгээр сарын 10-ны өдөр ЭМГ, Зооноз өвчин судлалын төвөөс тус вакциныг нийт алба хаагчдад хийлээ.

Хачигт халдвар нь хүнд хачгаар дамжин халдварладаг байгалийн голомтот хурц халдварт өвчин юм. Дамжуулагч хачгийн төрөл зүйлээс хамааран ой мод ихтэй бүс нутагт хачигт энцефалит, хачигт боррелиоз өвчнийг дамжуулагч хачиг, харин риккетсиоз өвчнийг дамжуулагч хачиг ихэнх нутгуудаар тархсан байдаг. Хачгийн эзэн амьтдад нохой, хулгана, зарим мэрэгчид, үхэр, хонь, ямаа, тэмээ, нохой зэрэг ордог.
Хачгаар дамжин халдварладаг 30 гаруй халдвар байдгаас манай оронд хачигт энцефалит, хачигт боррелиоз, хачигт риккетсиоз өвчнүүд 2005 оноос албан ёсоор бүртгэгдэж эхэлсэн байна.